Zenn i konn plis lo fabrikasyon lenstriman lanmizik tradisyonnel |29 October 2008

Partisipan dan sa latelye ti bann Renyonnen ki’n vin Sesel pour ede promot bann lenstriman tradisyonnel ki servi Larenyon osi byen ki isi.

Veteran dan lanmizik Seselwa, Patrick Prosper, ti fasilitater dan sa kour ki ti al pour en demi zournen.

Msye Prosper, ki annan plis ki 50-an leksperyans koman en mizisyen, i osi fer diferan lenstriman mizikal tradisyonnel.

I ti anmenn legzanp diferan lenstriman dan diferan letap fabrikasyon pour montre bann partisipan sa kour.

“I pa difisil pour fer en tanbour moutya, me sel problenm ki mon pe rankontre pour le moman se ki i annan en mank lapo kabri pour fer li,” Msye Prosper ti eksplike.

Dapre Msye Prosper sa eleman esansyel dan fabrikasyon en tanbour i sitan rar ki aktyelman zot bezwen enport lapo kabri.

Parmi bann keksoz ki bann partisipan ti osi aprann se ki i pran trwa zour avan ki lapo kabri lo en tanbour i fini sek e ki i kapab ganny servi.

Msye Prosper in osi dir ki sa kour i en fason pour bann mizisyen fer lesanz konnesans osi byen ki zwe bann lenstriman ki zot bann koleg i servi dan zot pei.

“Mon ti teste Zez ki servi Larenyon e mon’n trouve ki letan ou akord li byen i kapab donn en bon kalite son,” Msye Prosper ti fer remarke.

Apre sa kour bann partisipan ti al dan serten lekol pour donn bann zenn lenformasyon lo bann lenstriman.

Lekol Pointe Larue – ki osi landrwa kot Msye Prosper i annan en group etidyan ki i montre zwe lenstriman tradisyonnel – ti parmi bann lekol kot sa group in ale.

Msye Prosper in dir ki sa i en fason pour bann zenn kapab kontinyen zwe lanmizik tradisyonnel menm si bann pli aze i arete.