Lotorite i demann marsan pour aret kasyet marsandiz |14 November 2008

Sa i vin apre ki sa lorganizasyon ki defann lentere konsonmater in rikord anviron 110 konplent lo marsan ki pe kasyet papye twalet akoz spekilasyon ki pri sa komodite pou ogmante byento.

NATCOF ek lenspekter lotorite laysennsing (SLA) in pas dan plizyer laboutik yer separeman. NATCOF in dekouver papye twalet, dile ‘melody’ ek diri dan mazorite stor ki ti’n kasyet.

“Nou pe fer kler ki aksyon sever pou ganny pran kont sa bann boutikye ki repet sa lofans,” Jules Hoareau, sef egzekitif NATCOF, in dir dan en kominike.

« Depi Merkredi in annan spekilasyon ki pri papye twalet ek lezot marsandiz pou monte e se la kot marsan in komans retir sa bann marsandiz lo letazer, » Msye Hoareau in dir.

Dapre Msye Hoareau, i annan en laboutik Beau Vallon ki ti’n kasyet plis ki 1500 roulo papye twalet.
Ziska la pri papye twalet i ankor R3.50.

NATCOF i dir i konsyan ki dan en marse lib napa pri kontrol, me in toudmenm dir ki marsan i merit azir responsab e ki konsonmater pe senpleman demann en pli bon kondisyon.

In demann marsan pour aret kasyet marsandiz, met pri lo komodite e pa takse marsandiz vye stok lo nouvo pri.

« Nou konnen ki byento pou annnan logmantasyon dan pri bann marsandiz de baz, alors NATCOF pe demande ki ansanm avek bann lazans konsernen tel ki SLA, Younit Proteksyon bann Konsonmater, nou zwenn ansanm pour met en fren avek sa nouvo pratik  kasyet marsandiz, » Msye Hoareau i dir dan son kominike.

Dapre Msye Hoareau, menm sityasyon in devlope lo Praslin.
NATCOF in met an plas en laliny telefonn spesyal pour sa bann konplent - sa i 226102. Konsonmater i ganny demande pour telefonn sa nimero pour okenn konplent.