Ledikasyon Konsonmater-Konsonmasyon drog ilegal ek papye sigaret |10 December 2008
Resers in prouve ki pandan bann peryod reform i annan plis problenm sosyal, logmantasyon dan ka kriminalite e deklen moral. Konson mater i konsonm de keksoz : komodite ek servis. Drog i en sibstans ki par natir biznes i anmenn gran reveni ek bokou koripsyon.
NATCOF i annan rezon pour krwar ki konsonmasyon sibstans in ogmante e lavant osi in monte. Alors sa i fer ki plis dimoun pe fer sa biznes. CARE in fer bokou pour edik e sansibiliz popilasyon. Aprezan se nou konsonmater ki merit pran nou responsabilite.
• Konbyen zenn ozordi ki pa kapab viv san eroin ?
• Konbyen ki’n perdi lanplwa e menm perdi zot fanmiy akoz sibstans?
• Konbyen konsonmater ki’n vin depandan lo sa bann sibstans ilegal?
Koman konsonmater, tou sa ki nou konsonmen i annan en lenpak lo nou lavi ek nou devlopman. Lorganizasyon konsonmater i apresye tou travay ki’n ganny e pe ganny fer pour adres sa konsern, me lo lot kote, NATCOF pe demann plis langazman sorti kot lezot parti ki enplike dan sa lalit.
NATCOF pe osi demande ki ‘papye sigaret’ i ganny ‘ban’ Sesel. Ozordi nou vwar ki serten marsan pe vann papye sigaret ziska avek zanfan anba 18-an. Zot pe dir ki sa i en papye sigaret non pa en sigaret. Fodre realize ki sigaret e okenn keksoz ki asosye direk ou endirek avek sigaret pa merit ganny vann avek zanfan. Lavant papye sigaret in vin en biznes lo limenm. En kaye ki annan 100 fey i kout R20. En fey -- savedir enn sa papye -- i kout R1.50 a R2, sa vedir ki biznes pe fer gran profi lo detriman lavi.
Napa en lot marsandiz kot vander i ganny telman en gran profi. NATCOF i kondann sa, e nou pe demande ki en ‘ban’ total i ganny mete lo papye sigaret.
An konklizyon, nou rapel konsonmater ki sakenn de nou nou responsab nou lavi. Se konsonmater ki swazir ki i anvi fer avek son lavi. Sa i en swa sak konsonmater si i anvi drog ou non. Otan ki i annan demann, pou annan lavant e otan ki i annan lavant pou annan lavi ki pou ganny brize.
En kontribisyon NATCOF