Lanrezistreman Voter 2009-Zofisye lanrezistreman i sermante |13 January 2009

Zis avan ki bann zofisye ti pret serman, Msye Gappy, ki fek ganny re-apwente koman komisyonner eleksyon pour ankor 7-an, ti donn bann zofisye en apersi bann plan ki son biro i annan pandan son nouvo manda.

Parmi bann proze ki zot annan plan fer se ansenny bann prose elektoral koman en size dan lekol afen ki bann zanfan a konsider pran li koman en karyer dan le fitir.

Me Msye Gappy in dir ki enn son bann lobzektif kle pandan son nouvo manda se fer dimoun pli okouran travay ki son biro i fer.
Bann zofisye ki ti sermante yer ti osi diskit bann lozistik legzersis lanrezistreman ki demare demen le 14 Zanvye e pou ale ziska le 27 Zanvye.

Antou i annan  14 zofisye lanrezistreman voter  – enn i travay pour de distrik elektoral - me bann ki pour La Digue, Grand Anse Praslin ek Baie Ste Anne in fini pret serman depi Sanmdi.

Dapre Msye Tirant i annan de asistan ki travay avek sa bann zofisye dan sak sa bann distrik, me selman bann landrwa ki en pe pli gran i ganny trwa stasyon.

Anse Etoile i reste pli gran distrik avek 3,623 dimoun ki kalifye pour vote tandis ki Port Glaud i pli pti distrik avek 1,799.