Kominike Lapolis-6 mwan prizon pour pran larzan lo fo preteks |12 February 2009

Fred ti komet sa lofans le 3 Fevriye letan i ti pran deviz osi byen ki roupi Sesel avek en koup Franse angiz pour anmenn zot ekskirsyon lo zil Curieuse.  Fred, ki pa dan sa kalite biznes, ti’n servi kart biznes en lot dimoun pour anbet son viktim.

I ti ganny arete Merkredi le 4 Fevriye, pas ankour menm zour kot i ti pled koupab, ganny rimann, e son zafer ti ganny anvoye pour Vandredi.

Letan i ti retourn ankour Vandredi i ti ganny kondannen 4000 roupi lanmann e osi ganny ordonnen pour ranbours sa larzan ki i ti’n pran pour sa koup etranze.

Lefe ki Fred pa ti kapab zwenn sa kondisyon ki lakour ti’n enpoze lo li i ti ganny kondannen 6 mwan prizon.

3 mwan prizon pour vol

Cliff Pillay, en zonm 30-an sorti Anse Aux Pins, in kondann 3 mwan prizon akoz i pa’n arive pey en lanmann ki lakour ti’n demann li.

Pillay ti ganny trouve koupab pour en vol legim ki ti arive lo laferm Jacques Matombe, Anse Royale le 12 Zilyet lannen pase.

Kas batiman e vole

De zonm pe rimann

De zonm pe rimann an koneksyon avek lofans kas batiman e vole.
Premye i konsern en zonm 32-an sorti La Misere ki pe rimann an koneksyon avek en ka kot en letablisman touristik in ganny kase e serten keksoz ladan ganny vole.

Sa lensidan ti ariv dan distrik Anse Aux Pins le 18 Novanm lannen pase.
Sa sispe in ganny rimann prizon Montagne Posée ziska le 23 Fevriye zour ki i pou repas ankour.

Dan en dezyenm ka, en zonm 33-an sorti Vilaz Quincy in pas ankour e ganny rimann koman sispe dan omwen 4 ka kas lakaz e vole. Dan enn sa bann ka en madanm ti ganny menase avek kouto dan son lakaz e apre ganny vole.

Sa bann lofans in ganny komet dan rezyon Ma Constance ant le 23 Zanvye ek le 2 Fevriye sa lannen.

Sa sispe pou repas ankour le 24 Fevriye antretan ki lapolis i kontiny zot lanket dan sa bann ka.

De zonm i kondann prizon pour trafik drog

De zonm in kondann prizon pour trafik drog.
Rodney Laira, en zonm dan son trantenn lannen sorti Anse Nord-Est, in kondann 8-an prizon tandiski Dave Confait, aze 35-an e ki sorti Belonie, in kondann 5-an.

Laira ti ganny arete Lari Hangard an posesyon drog kanabis le 19 Fevriye lannen pase e depi somn larestasyon i ti lo rimann.

Lakour in ordonnen ki sa 1-an ki in fer lo rimann i ganny dedwir lo son santans.

Confait ti ganny arete le 12 Septanm 2007 Belonie menm.

Parey dan ka Laira, lakour in egalman ordonnen ki sa 1-an 5 mwan ki Confait in fer lo rimann i ganny dedwir lo son 5-an ki i sipoze fer prizon.
Prosekisyon Confait ti pour trafik drog eroin.