Lager avek gard |09 March 2009

Kas batiman e vole

En zonm 34-an sorti La Gogue ek en lot 27-an sorti Union Vale ti ganny arete mardi pase, pas ankour e ganny rimann ziska le 12 Mars.  Sa i an koneksyon avek en ka kot en laboutik elektronik lo Lari Albert ti ganny kase e en DVD ti ganny vole ladan Sanmdi le 28 Fevriye. 
En 3enm sispe dan sa ka, en zonm 33-an sorti La Gogue, ti ganny arete Zedi, anmenn ankour e ganny rimann ziska ozordi.

Vol

En zonm 32-an sorti Pointe Larue in ganny sarze pour en lofans vol ki ti arive kot Sacos Tower Lendi le 2 Mars.  An kometan sa lofans sa akize in kas serten kondisyon ki lakour ti’n deza larg li lo la an relasyon avek en sarz vol pase lo li an Me 2008.  Sa akize in ganny rimann prizon Montagne Posée ziska ler son bann zafer i fini ek lakour.

Lenportasyon drog ilegal

Noddy Agathine, en zonm 30-an sorti Baie Lazare, in kondann 5-an prizon pour lofans lenportasyon drog ilegal. Agathine ti ganny arete lo erport enternasyonal Pointe Larue le 4 Zen 2005 an posesyon serten kantite granm kokain osi byen ki hashish. Agathine, ki’n fer 8 mwan lo rimann, pe ganny sa letan dedwir lo son santans. I ti kondannen Vandredi semenn pase.