Miting konsiltativ Les Mamelles-Prezidan i felisit Les Mamelles pour fer son kominote koste |11 July 2009
«Mon krwar lefe ki koman en kominote e koman en nasyon nou pe ini ansanm, i pou fer nou reisi sirmont bann defi. I pou fer nou reisi dan nou bann proze devlopman ki nou pou fer akoz se ler ki en dimoun i kontan son distrik ki i pou koste e kapab kontribye li osi, » i ti dir.
Prezidan in osi fer remarke ki dan sa distrik i annan bokou zenn ki’n sezi loportinite e pran lo zot menm pour arive fer sikse.
Prezidan Michel, ki ti pe koz kot miting konsiltativ dan sa distrik Zedi, ti dir ki i enportan pour ankouraz sa bann zenn pran loportinite devlope e fer sa ki byen.
Sa miting Les Mamelles, ki parey dan lezot distrik ti deroul anba tenm « Koste Seselwa - Annou koz lo lavenir Sesel », ti osi asiste par Vis-Prezidan Joseph Belmont, tou bann minis, ladministrater sa distrik e o zofisye dan gouvernman e dan bann lakonpannyen paraetatik.
Fodre note ki manm Lasanble Nasyonal pour sa distrik, Onorab Bernard Georges, in personelman ekri Biro Prezidan pour prezant son leskiz pour absante dan sa miting akoz i aletranze.
Letan i ti pe adres bann zabitan Les Mamelles, ki ti’n desann an gran nonm pour partisip dan sa miting, Prezidan Michel ti eksplike ki letan en pep, en nasyon i fer fas a defi ek difikilte i enportan ki tou dimoun ki kontan son pei, tou dimoun ki kontan son nasyon i war mannyer pour travay e met latet ansanm pour sirmont sa bann defi e anmenn pei pli devan.
« Parey ozordi nou vwar, defi ki frap lemonn in osi frap nou pti pei akoz nou osi nou form parti sa monn globalize, » i ti dir e azoute ki sa bann sa bann defi i osi anmenn bann loportinite.
Prezidan Michel ti fer referans lo sa deklarasyon fer par lider bann diferan group relizye State House Merkredi kont labi drog ek sibstans.
«Sa i en keksoz ki’n fer mwan plezir, ki’n fer mon gouvernman plezir akoz dapre zot se nou spirityalite ki ini nou e fer nou vin en lafors pour nou kapab fer fas a bann defi. Ler nou vwar nou bann dirizan spirityel vin devan e aport zot soutyen a bann lalit e bann defi, sa i rekonfort nou, » i ti dir.
I ti profite pour felisit zot pour zefor ki zot pe fer dan lakominote ansanm avek bann lazans pour elimin sa problenm.
Zisteman, problenm drog dan distrik Les Mamelles ti en size ki bann zabitan ti koz bokou lo la pandan miting Zedi. Sa ti enkli lenpak sa problenm lo sa distrik e osi lefe ki bokou sa bann adik pe profit lo lasistans lazans welfer pour zot kontinyen fim zot drog.
Enn parmi ti en zenn manman ki’n dir ki i son swe war gouvernman akseler lalit kont problenm drog Les Mamelles vi ki sa problenm pe etouf potansyel zenn sa distrik.
Lo sa size, Prezidan Michel ti asir zot ki gouvernman pe fer sir ki drog pa antre dan pei menm depi aletranze.
Lezot size ki ti souleve ti annan pour fer avek :
• mank lalimyer kot flat Les Mamelles
• latitid serten direkter dan biro gouvernman ki pa oule koste avek travayer
• problenm semen anler La Louise
• kontrakter ki zis pran larzan dimoun e pa fer zot louvraz
• kou delo ki tro o
• problenm ki travayer Ste Anne Resort pe fer fas avek
• fason ki travayer lanplwa i fer zot travay e bann ki profit lo servis ki lotel i ofer zot
• drenaz lo serten semen
• nesesite aranz en trotwar lo semen prensipal pre kot klinik ziska kot ‘bus stop’
• pri komodite parey manze e osi materyo konstriksyon ki zot dir i ankor tro ser.