Miting konsiltativ Mont Buxton-Prezidan i enplor bann zenn pour pa les drog detri zot lavi |25 July 2009

Prezidan ti lans sa lapel dan miting konsiltativ Mont Buxton Zedi swar letan i ti pe reponn kestyon e konsern en zabitan lo size bann vol ki arive e ki asosye avek drog. Sa zabitan ti fer resorti ki bann zenn i kas lakaz dimoun, vol bann keksoz ki zot kanmarad in rente pour gannyen e zot al vann pour nanryen zis pour ganny en pti morso drog.

Prezidan ti dir ki i annan bokou zenn ki pe mor e lezot ki gravman malad e sa i akoz lo marse ansemoman i annan mwens drog ki pli ser e sa pti git ki annan trafiker pe melanz avek bann diferan kalite sibstans danzere e ki touye.

I ti dir ki lalit pour diminyen lakantite drog lo marse pe kontinyen e ki i annan en gro travay serye ki pe ganny fer pour limit otan ki posib larantre sa bann sibstans danzere dan pei.

A sa pwen i ti fer resorti ki partenarya ki lotorite Seselwa i annan avek bann lorganizasyon aletranze pe anmenn rezilta e drog pe pti a pti diminyen lo marse.

Prezidan ti fer remarke ki sa lalit pa fasil e menm si bokou travay pe ganny fer, bokou sipor e kolaborasyon tou dimoun dan bann kominote i neseser pour ede rezourd sa problenm.

Antretan i dir gouvernman, atraver lazans ki lit kont drog NDEA, pe fer tou sa ki i kapab pour atrap bann trafiker.
En lot konsern asosye avek zenn ki ti leve e ki Prezidan ti koz longman lo la ti konportman zenn dan lekol e plan gouvernman lo sa size.

Prezidan ti dir ki sa i en problenm ki konsern lasosyete antye e i en defi ki nou bezwen sirmonte menm si i enn ki konpleks. I ti dir ki tou dimoun, paran an premye, lekol, kominote e lezot, sakenn i bezwen pran son responsabilite pour adres sa bann problenm.
I ti dir bann mezir anplas i bezwen ranforsi e sa i enkli redevlopman en sant reabilitasyon pour zenn e empowerment bann lorganizasyon non-gouvernmantal lo sa size. I ti deklare ki gouvernman i konsyan sa problenm e i pe demann tou bann minister konsernen pour devlop bann progranm dan sa direksyon. Prezidan ti demande ki fodre i annan en zefor nasyonal pour adres sa size.

Prezidan ti osi koz bokou lo size bann zenn graduates ki reste aletranze apre ki zot in konplet zot letid e sa ti apre ki en lot zabitan ti oule konn posibilite ki annan pour bann zenn Seselwa al travay aletranze.

Prezidan ti donn legzanp bann pilot ek cabin crew Air Seychelles ki pe travay deor e bann graduates ki pa’n retournen parmi lezot ankor. I ti dir ki posibilite i annan pour tou sa ki annan skills e Seselwa i lib pour al travay kot zot oule menm si i ti a swete ki zot ti a reste pour travay pour devlopman zot pei ki’n envestir en kantite dan zot.

La i ti lans en lapel a bann graduates pour retournen apre zot letid pour vin travay enpe pour zot pei e pour omwen donn enpe sa ki pei e pep Seselwa in donn zot apre plitar zot ava al rod greener pastures.

Parey bann lezot distrik, zabitan Mont Buxton ti osi annan zot bann sizesyon pour ed gouvernman dan son bann plan e osi zot bann konsern e kestyon ki zot ti anmenn a latansyon Prezidan ek son bann minis.

Parmi bann sizesyon ki Prezidan ek son bann minis ti konsider koman tre valab e enteresan e ki pou ganny pran an konsiderasyon ti :

• Plis lotonomi pour bann distrik ki Prezidan i dir serten mekanizm i deza pe ganny met an plas,
• Ki PUC i vin avek en mezir pour ed bann fanmir aste en tenk pour prezerv delo,
• Sanzman dan ler ki lekol i komanse e fini,
• Lentrodiksyon nurse practioners ki minis konsernen i dir i deza pe ganny etidye.
Bann kestyon ek konsern ti enkli :
• Nesesite pour redevlop zarden zanfan anvil,
• Plis akse pour zanfan lekol avek Stad Linite,
• Bidze pour bann federasyon sportiv,
• Nesesite pour revwar loperasyon Unit Casualty kot Lopital Victoria,
• Proze redevlopman lakaz ek semen Dan Lenn,
• Agrandisman semen dan Mont Buxton an zeneral,
• Servis bis ek delo dan sa distrik, parmi lezot ankor.