Yam i kit memwar Jocelyn Perreau vivan avek albonm Ma Vie |08 May 2010
Sa nouvo travay ki annan pour tit Ma Vie ti ofisyelman lanse pandan en seremoni ki ti deroul kot galeri Carrefour des Arts, Vandredi pase.
Prezan kot sa seremoni lansman ti Minis pour Ledikasyon, Msye Bernard Shamlaye, sekreter prensipal pour Lazenes, Spor ek Kiltir, Msye Denis Rose, sef egzekitif Konsey Nasyonal pour Lar, Madanm Jacqueline Moustache-Belle, Manm Lasanble Nasyonal pour distrik Les Mamelles, Msye Bernard Georges, bann manm lafanmir Perreau parmi plizyer lezot envite.
Apard ki lafanmir Perreau ki’n zwe en rol determinan dan sa proze, Yam ti osi profite pour remersye tou bann sponsors ensi ki tou dimoun ki’n dan en fason ou en lot aport zot kontribisyon dan sa proze avan ki i ti enterpret sanson Ma Vie – ki osi trouve lo sa albonm – pour tou bann ki ti la.
Letan i ti pran laparol, tre emosyonnen, Madanm Michol Perreau ti remersye Yam pour son linisyativ ki i ti dir pou ede kit memwar Jocelyn vivan.
I ti dir ki i osi tre rekonesan pour lafason ki sa zenn artis in antreprann son travay avek bokou respe pour Jocelyn osi byen ki lafanmir. Madanm Perreau ti eksplike ki toudilon proze, Yam in touzour enplik lafanmir Perreau ki’n osi kontribye zot par.
I ti fer konpran ki Joëlle, fiy Jocelyn, in aktiv dan koreksyon bann teks e in osi ed Yam avek bann prononsyasyon korek, tandis son frer Luc in plito enplike plis dan dekorasyon ek lanbalaz albonm.
Madanm Perreau ti osi dir ki lafanmir i tre rekonesan pour lafason ki Yam in pran en rol plito segonder dan sa proze e met Jocelyn premye. Sa, i ti dir, i tre evidan dan portre ki’n ganny servi lo kouvertir sa albonm.
I ti azoute ki atraver sa proze ansanm avek Yam, zot in ganny sans realize ki kantite sanson Jocelyn i annan e zot in osi dekouver posibilite pour fer plis bann travay parey dan lavenir.
Jocelyn Perreau ti ne le 4 Zen 1950 Moris e i ti mor le 31 Out 2001.