En lapel pour ed sa kat fanmiy afekte par dife |13 January 2011

Ti Zedi le 6 Zanvye ki dife ti ravaz e met ater kat lakaz anmenmtan, apre ki i ti’n konmans dan enn premye e apre propaz dan sa trwa lezot ki ti sitie lanmenm tre pre obor.

Manm sa bann fanmiy i dir ki trwa dan kat lakaz ti annan dimoun ladan ler dife ti konmanse, me avek lavites ki dife ti propaze, selman zis kat sez plastik ek en latab ki ti kapab ganny sove.

Malgre en trazedi kot lavi 12 dimoun in ganny severman afekte, manm sa bann fanmiy i dir ki zot konsole par le fe ki personn pa’n ganny blese ou perdi son lavi.

Zot osi annan remersiman spesyal pour biro Prezidan, Minis Vincent Meriton ek son lekip, manm lasanble Jennifer Vel, ladministrater distrik, manm komite santral, brigad dirzans distrik Pointe Larue, Sosyete Lakrwa Rouz, Seychelles Trading Company, Caritas, Seychelles Breweries, lafanmiy Gabriel, Vivienne Johnson, ek tou lezot endividi, lorganizasyon ek lakonpannyen ki’n ed zot.

Zournalis Seychelles Nation ki ti koz avek sa bann fanmiy Lendi swar in aprann ki tou bann manm sa kat fanmiy pe aprezan reste kot lezot manm fanmiy me ki malerezman bokou plis led i neseser.

Sa i enkli sirtou bann keksoz de baz tel ki manze, servyet, dra, matla, tetdorye, tapi, aytenm elektronik tel ki rice-cooker, karo, fridge, cooker, kastrol, parmi lezot ankor.

En lapel spesyal pe ganny lanse avek bann endividi, lorganizasyon ek biznes ki kapab ed sa bann fanmiy, pour kontakte lotorite distrik Pointe Larue oubyen Zina lo 761361.