Dimoun avek dezabilite i montre zot talan ek abilite |13 July 2011
Zot ti demontre sa atraver en seri aktivite ki ti ganny organize yer kot sant vokasyonnel pour bann dezabilite kot Sant Reabilitasyon.
Dan en pti spektak varyete, sa bann zenn adilt ti fer diferan performans ki ti enkli ladans,
Sa bann aktivite ti ganny organize par Konsey Nasyonal pour bann dimoun avek dezabilite a lokazyon Lazournen Dimoun avek Dezabilite.
Pandan sa lazournen, Konsey ti’n prepar en seri aktivite kot bann paran in ganny sans enterakte avek zot zanfan e osi avek bann enstrikter kot sa sant.
Maurice Denys, ki ansarz terapi vokasyonnel kot sa sant, in dir i fer premye fwa ki zot organiz en tel aktivite enteraksyon e ki Konsey i satisfe avek partisipasyon paran.
Bann aktivite enteraksyon ti enkli preparasyon rafresisman ek dezennen pour sa lazournen, netwayaz deor e osi byen ki dan laklas.
« Pandan sa letan enteraksyon, zot in ganny sans diskit performans ek progre ki zot zanfan pe fer e sa ava ede anmenn sa kolaborasyon ant paran, zanfan ek lenstrikter, » i ti dir.
Lazournen ti osi ganny beni avek lapriyer par ansyen Levek Anglikan French Chang-Him ki ti parmi bann envite prezan.
Ti osi annan performans par bann artis lokal tre popiler tel ki Chicco Martino, en dezennen spesyal e osi en Hop pour sa bann zenn.
Patricia Rene, direktris servis reabilitasyon, in remersye bann paran pour zot partisipasyon e in dir ki Konsey i swete ankouraz plis sa bann devlopman pour byennet sa bann etidyan kot sa sant.
Madanm Rene ti osi prezant Joesha Sophie avek son pri konman gannyan konpetisyon logo Konsey ki ti’n ganny organize.
Pandan sa seremoni, en reprezantan Biro Standar Sesel ti osi prezant sa sant avek en televizyon ek en DVD.
Msye Denys in osi lans lapel avek lezot partener pour vin devan e fer nenport kontribisyon anver devlopman sa bann etidyan kot sa sant.