Manm piblik i ralye an gran nonm pour Lafet Nasyonal |20 June 2014

Pour selebrasyon Lafet Nasyonal en gran nonm piblik ti ralye kot Stad Linite Roche Caïman Merkredi le 18 Zen kot plizyer aktivite ti’n ganny organize.

Bokou dimoun ti’n desann byen boner pour fer letour pour vwar ki ti annan dan bann diferan stalls ki ti’n met anplas avan ki zot ti antre anndan dan stad pour parad.

Parmi bann divertisman dan ban stalls ti ‘lucky dip’ kot bokou zanfan ti’n ralye pour tant zot lasans pour vwar ki zot in gannyen. Ti osi annan stalls kot ti pe vann bann diferan aytenm, bann stalls manze ti pe ofer manm piblik bann diferan pla, sirtou kreol.

Ti osi annan en spektak lanmizik kot benn ti pe zwe ‘live’ e bann diferan artis tel ki KJ, Extra big parmi lezot ankor ti la pour egey lafoul.
Bokou dimoun ki ti koz avek zournal Nasyon ti dir ki zot fer sir zot desann pour parad akoz i en tradisyon pour zot.

“Si mon pa vin get parad konmsi mon pa’n fet nou Lazournen Nasyonal,” en madanm ti dir.
Apre parad bann dimoun ti ganny egeye avek fedartifis menm si bokou zanfan ti enpe efreye. Ti osi annan bann demonstrasyon ki ti ganny fer par bann zanfan dan laplenn Stad Linite.

Apre ki tou ti’n trankil dan Stad Linite spektak andeor stad ti repran e bann aktivite ti kontinyen ziska tar dan lannwit.
Nou seri portre i montre en pe lanbyans andeor stad le 18 Zen.