Tou atlet Zwe de Zil pour ganny teste pour dopaz |24 September 2014
Tou atlet ki pou form par delegasyon Seychelles ki pou partisip dan Zwe de Zil La Réunion an Out lannen prosenn pou ganny teste pour dopaz. Se Minis pour Zafer Sosyal, Devlopman Kominoter ek Spor, Msye Vincent Meriton ki ti fer sa deklarasyon letan i ti pe reponn kestyon dan Lasanble Nasyonal yer.
Minis Meriton ti dir ki menm si napa atlet enternasyonal ki’n teste pozitif pour okenn kalite drog resaman, departman ki responsab pour sport ansanm avek Konsey Nasyonal pour Spor (NSC) i oule asire ki napa drog dan sport e ki sport Seychelles i reste prop. I ti azoute ki serten federasyon pe deza fer tes lo zot bann atlet avan konpetisyon enternasyonal. Dan ka kot i annan atlet ki teste positif, Minis i dir ki NSC pou ofer zot sipor atraver en progranm reabilitasyon. Sa i aplik pour bann rankont enternasyonal osi byen ki bann konpetisyon lokal.
Lo kote nasyonal zisteman, Minis responsab pour Sport in dir ki Komisyon Anti Dopaz pou kontinyen teste bann atlet. I ti fer remarke ki dan bann ka kot atlet in ganny kontrole pozitif depi 2006 kan bann tes ti komanse, zot in konsonm drog artizanal e napa ka ziska prezan kot in annan konsomasyon drog dir parey kokain ek eroin, ouswa stimilan parey steroid.
Serten manm Lasanble ti osi soulev konsern ki zofisye i refri match anba lenflians lalkol. Minis ti reponn ki bann federasyon ek NSC i bezwen asire ki bann zofisye i desarz zot responsabilite dan en fason korek e pran mezir kont zot kot i neseser.
«Spor ek dopaz pa ale avek kanmarad. Nou bi se tir bann zenn dan drog. Nou oule osi met zot dan spor pour ki zot kapab viv zot lavi dan en meyer fason,» Minis Meriton ti konklir lo sa size.
Zis pour fer remarke ki in annan ka resaman, par egzanp dan foutboul, kot zofisye in soupsonnen pe diriz match anba lenflians lalkol. Nou’n osi remarke ki bann tes anti dopaz pa pe ganny fer kot bann sit sportif depi en pe letan. Si i paret napa rezon pour sa dan lezot spor, kot i konsern foutbal Komisyon Nasyonal Anti Dopaz in eksplike ki akoz lanmwatye bann match pe aprezan zwe lo Praslin ek La Digue, zot napa ase resours pour al lo sa bann zil, e i pou diskriminatwar si zot kontrol zis lo Mahe. Dan le pase, in osi annan rapor ki kan serten atlet in ganny kontrole pozitif, zot in sempleman al fer en lot sport san ki zot in ganny anpese!
Touzour an se ki konsern Zwe de Zil e lezot zwe mazer, Minis Meriton ti reasir Lasanble ki ‘Major Games Trust Fund’ i ankor egziste pour ede finans preparasyon ek lorganizasyon sa bann zwe. I ti profite pour demann avek sekter prive pour konsider met plis larzan dan sa fon.
Minis ti osi anonse ki apard progranm spor delo sale ki ‘Sail Training Scheme’ i ofer kot Konpleks Sportif Roche Caïman, sa skim pe anvizaz entrodwir en progranm canoe ek lavwal dan serten distrik kot i annan delo sale. Sa pou osi aplik pour bann zil pros kan letan i permet. Lo Praslin, progranm spor notik an zeneral i sipoze amelyore avek konstriksyon basen naze lo Zil Eve.
«I annan en bezwen pour nou anmenn sa bann spor kot nou bann zanfan e devlop zot labaz si nou oule kontinyen mentenir nou dominasyon dan Losean Endyen, » Minis Meriton ti dir.
I ti osi asir bann reprezantan lepep ki son minister pe kontinyelman amelyor fasilite sportif dan bann distrik dapre zot priorite e dapre resours disponib.
M. Savy