En papa i aparaman noy son garson 9-an |14 January 2015

Lapolis in ouver lanket dan en lensidan kot en papa in aparaman noy son pti garson, Alistair Labrosse, ki aze 9-an apre retourn avek son lekor ater.
Sa lensidan ti ganny raporte avek lapolis yer boner apremidi e zofisye relasyon piblik dan lapolis Jean Toussaint in dir ki sa papa, ki aze 32-an e sorti Les Mamelles, in ganny arete e pe ganny detenir.

Msye Toussaint ti dir avek lapres yer ki se manman sa pti garson ki ti averti lapolis enpe avan 1er apremidi ki sa papa ti dir i ti pe al noy sa pti garson. Aparaman sa zonm ti pran en bato fibreglass Roche Caïman e diriz deor.

Msye Toussaint i dir ki i pa tro kler kote sa lensidan noye in arive, me i ti devwale ki a en serten pwen sa papa ti’n dir i ti pe al dan direksyon zil Frégate ek Gran Rocher.

Lapolis i dir ki zot ti mobiliz younit lapolis maritim ek gard lakot pour al rod sa zonm antretan ki sa manman ti reste dan prezans lapolis. Ver 2er sa papa ti telefonn sa manman e i ti retelefonn ankor 3er apremidi e dir li vin Petit Paris pour vin sers lekor son pti garson.

Msye Toussaint i dir ki lapolis, younit lapolis maritim ek gard lakot ti diriz zot loperasyon ver Petit Paris kot zot ti vwar lekor sa pti garson dan bato dan zanmerant laboutik Ramesh.

Sa papa ti ganny arete par lapolis par deryer lakaz son granmanman.

Touzour dapre Msye Toussaint, lenformasyon ki lapolis in ranmase i endike ki sa madanm ek sa zonm pa ti lo bon term. Sa madanm i reste Roche Caïman e sa zonm ti pe reste Les Mamelles. Sa pti garson li i ti pe reste avek son manman.

Msye Toussaint in azoute ki se lanket ki fek konmanse ki ava determin rezon egzakt deryer sa akt aparaman komet par sa papa.