Dirizan lopozisyon dan lasanble i diskit 4 size pertinan avek Prezidan |14 February 2015

Swivan en lot rankont ki i fer regilyerman avek Prezidan James Michel State  House, dirizan lopozisyon dan Lasanble Nasyonal  Msye David Pierre in diskit 4 size ki i dir i tre pertinan e devret ganny adrese san dele.

Sa bann size i ledikasyon ki i dir bokou ansennyan in anmenn zot konsern a son latansyon. Sa bann konsern i lo nouvo sistenm evaliasyon (appraisal) ki’n entrodwir dan bann lekol e ki i dir bokou ansennyan i ankor santi zot konfize lo la e bokou zot pa pe siny bann dokiman neseser e zot pe ganny apele lo en one to one basis pour vwar akoz sa pe arive.

“Mon pe dir ki sa i en size ki kapab dekouraz bann ansennyan e nou pa kapab afford konman en pei pour perdi ankor plis ansennyan ki nou’n deza perdi alor i neseser met sa size lo latab e ekout bann ansennyan akoz se zot ki fer nou sistenm ledikasyon marse. Minister ek bann ansennyan zot bezwen ariv lo en konklizyon ek en solisyon lo sa size,” Msye Pierre ti dir.

Lekonomi, pli partikilyerman logmantasyon dan pri lavi ek nesesite ki mezir i ganny pran pour fer  ki roupi i reganny son valer, ti en lot size ki ti ganny diskite.

“Nou’n dakor ki tou bann mezir i bezwen ganny pran pour koriz sa debalans ki ti annan dan balans peyman pour fer sir ki reset ki nou pe gannyen anterm lakantite deviz ki pe antre dan pei i ale avek demann ki annan pour sa bann deviz e i responsabilite gouvernman pour pran sa bann mezir ki devret soutenab e a lonterm,” Msye Pierre in dir.

Dimoun aze  konman en priyorite ti lot size ki Msye Pierre ti aborde avek Prezidan Michel. Lo sa size i ti remet lanfaz lo deklarasyon ki i ti fer dan son larepons lo diskour bidze pour sa lannen. Sa i ki dimoun aze zot ganny en logmantasyon ki anliny avek sa 20% ki gouvernman ti donn bann travayer.

“Mon pe mentenir ki lemoman ki lekonomi i ariv lo sa nivo kot gouvernman i kapab donn en logmantasyon bann dimoun aze i fer li pour permet sa bann dimoun viv en lavi avek enpe plis dignite vi logmantasyon dan kou lavi,” Msye Pierre ti fer resorti.

Lot size ti konsern sistenm taks ki i dir menm si in annan plizyer logmantasyon ki’n donnen ase reasaman, gouvernman i devret rod fason pour reorganiz sa sistenm pour ki i vin pli zis pour bann biznes e osi pour bann dimoun ki ganny en saler pli ba.

“Fodre reorganiz sistenm taks dan sa direksyon osi pour ki taks i ganny peye lo en sliding scale pour ki bann dimoun mwen fortinen ava ganny en redikyon dan taks ki zot peye e sa anretour a permet zot anmenn plis larzan dan lakour,” Msye Pierre ti dir.
Lezot size parey fleo sosyal ti osi ganny diskite.