Pri gas i desann |07 April 2015

Apartir ozordi, pri gas ki servi pour kwi manze ouswa ‘LPG’ in desann sorti R18.50 par kilo pour vin R17.00 par kilo.

Sa i vedir ki en boutey 4.5 kilo ki ti pe vann R83.25 i aprezan vann R76.50. En boutey 9 kilo ki ti kout R166.50 i aprezan kout R153.00. Pri in vin R204 dan plas R222 pour 12 kilo e R408 dan plas R444 pour 24 kilo.

Dan ka bann gro boutey 48 kilo, zot aprezan kout R816 olye R888.
Se sef egzekitif Seypec (Seychelles Petroleum Company) Conrad Benoiton ki ti fer sa lanons dan en konferans de pres kot son biro lo Nouvo Por yer.  
Dapre Msye Benoiton, sa rediksyon in posib apre ki in annan negosiasyon avek fourniser Seypec lo sa size.

Rediksyon dan pri in osi kontribye par en bes dan valer dolar e ero, deviz ki sa lakonpanyen i pey son bann enportasyon avek.
En lot eleman ki’n osi favoriz sa rediksyon dan pri gas se pri transpor kargo ki’n osi desann resaman.

Msye Benoiton in azoute ki sa rediksyon dan pri i tonm dan kad zefor Seypec pour negosye pri lenerzi ki i enporte e i reflekte filozofi pour fer desann pri lenerzi.

Seypec in anonse ki sa nouvo pri pou reste pour omwen senk mwan akoz sa i koresponn a peryod stokaz en kargezon gas.
Sa lakonpanyen i dir ki i pou kontinyelman reviz kou gas ek karbiran baze lo bann fakter ki determin pri.


Nou a rapel ki Seypec ti le 10 mwan pase anons en bes dan pri gas ek pri karbiran lo laponp. Seypec in endike ki pri karbiran i kapab sanze tou le semenn akoz sa i frekans ki Seypec i enport sa kapasite.

Akoz gas i ganny enporte an pli gran kantite, son pri i lozikman reste pli stab e sanz mwen souvan.