Lasanble Nasyonal i aprouv Fon Konservasyon e Adaptasyon Klimatik |13 November 2015

Dan son sesyon Mardi, Lasanble Nasyonal ti aprouv kreasyon Fon Konservasyon e Adaptasyon Klimatikpour Sesel oubyen ‘SeyCCAT’ parey bann spesyalis finans ek lanvironnman i apel li.

Sa fon pou permet Sesel esanz son det eksteryer pour ladaptasyon ek sanzman klimatik. Sa mekanizm pou permet Sesel renegosye son det avek son bann krediter avek bann nouvo kondisyon pli favorab, pour li kapab an retour finans bann proze konservasyon  e adaptasyon pour sanzman klima. 

En lagreman in fini sinyen avek bann manm Club de Paris pour reaste 30 milyon  dolar det eksteryer pei pour adaptasyon klimatik.

Rezilta se ki sa parti det pou prezan vin det ‘SeyCCAT’.

Atraver sa tranzaksyon, montan sa det pou osi redwir par 5% e son repeyman pou fer an roupi olye deviz etranzer.

Kreasyon ‘SeyCCAT’ ti vin atraver en proze de lwa prezante par Minis pour Finans, Komers ek Lekonomi Ble Jean-Paul Adam. Minis Adam ti eksplike ki pour asire ki ‘SeyCCAT’ i vin soutenab e annan kapasite pour kontinyen avek finansman bann proze lanvironnman e klimatik, i ti neseser pour sa fon ganny kree anba son prop lalwa e vin en fon piblik. Dan sa fason, i pou kapab administre son kapital ek lezot byen.

‘SeyCATT’ pou dirize par en bord nef manm ki pou konpri reprezantan bann lazans gouvernman, The Nature Conservancy (TNC) sosyete sivil, ek kominote biznes lokal.