Prezidan Faure i travers kannal lo bato pour al marsande Praslin |14 November 2016

Prezidan Danny Faure in kit Sesel yer pour Marok kot in al partisip dan konferans Nasyon Zini lo Sanzman Klima, me avan sa i ti Praslin Sanmdi lazournen pour ekout konsern bann Pralinwa.

Konmdir santer popiler Joseph Louise, i ti sot 21 mil kannal pour al Praslin par bato Cat Cocos 7er30 bomaten e retourn Mahé 6er diswar ape ki i ti’n al get en bout match foutbol ant Côte d’Or ek St Louis ki ti fini lo skor 6-2 an faver tim Praslin Côte d’Or.

Avan miting 9er dan sant Sosyal Baie Ste Anne Praslin, Prezidan Faure ti marse apye dan Baie Ste Anne santral kot i ti koz avek bann dimoun, menm bann ki ti an defo avek lalwa akoz zot ti pe tap zot pti bwar pa tro lwen avek semen anfas laboutik Ah-Yune.

O menm moman Ron Lesperance ti antre avek son bann gro pake kordonnyen ki ti kout zis 100 roupi e Prezidan Faure pa ti ezite tenir en pti konversasyon avek li.

Enn bann dimoun ki ti prezan ti dir nou ki Ron i enn bann meyer peser lo Praslin e ki “pri son pwason i rezonnab akoz ou kapab ganny menm trwa bouyon pour en fanmir”.

En pti pe pli devan dan direksyon lasose, Prezidan ti koz avek bann peser ek vander legim. E nou ti kapab remarke ki i ti menm aste margoz ek gro piman.

Kestyon ki nou kapab demande, eski Prezidan Faure in prepar son salad margoz avan in al Marok oubyen i pou espere pour fer li letan i retourn dan pei le 19 Novanm?

Nou seri portre i montre Prezidan Faure pe enterakte avek plizyer zabitan Praslin.