Trwa zonm i ganny sove par elikopter lo en montanny |18 May 2017

Trwa zonm ti ganny sove yer lo en montanny ki pa tro ganny frekante dan rezyon montanny Morne Seychellois.

Sa trwa zonm ‒ Julio Souris, Selwyn Laurence ek Marcus Lespoir ‒ ti’n al marse dan lafore depi Mardi me letan zot ti pe retournen zot pa ti trouv semen. Zot dir zot ti vwar zis ranpar. Zot ti pas lannwit dan bwa apre ki zot ti’n enform lapolis ki zot ti’n pri lo sa montanny.

Napa okenn santye ki al lo sa montanny e sa trwa zonm ti bezwen esper ziska yer bomaten pour zot ganny sove par elikopter Zil Air.