Let pour editer - En pti pe plis respe pour kreol silvouple |25 October 2017
Bokou dimoun enkli mwan menm nou vreman dezapwente avek fason bann aktivite Festival Kreol pe deroule.
Avek tou respe pour bann organizater ki’n esey zot mye pour fer sa festival en sikse. Landrwa kot louvertir in fer napa problem, i annan ase bataz pour dimoun sirkile e i donn en lot latmosfer.
Me seremoni louvertir ti en dezapwentman.
Ti ava enteresan konnen ki kriter ki servi pour envit oubyen swazir mizisyen ek santer pour partisip dan seremoni louvertir. Akoz ki toultan menm santer e menm mizisyen ki enplike? Oli lezot?
Pa ti ava gou vwar nou bann ladans tinge ek sokwe? Konbyen zanfan ek zenn ki konnen oubyen ki’n deza vwar oubyen ki rapel ki mannyer sa bann ladans i danse, ki fason dimoun i abiye pour danse? Sa ti bann ladans kot nou zanset ti eksprim zot mizer ek zot soufrans. Pa tro lontan pase ti annan en Seselwa ki ti’n etidye ladans tinge e ti pe montre serten dimoun kot Lenstiti Kreol. Pa i ti ava bon si sa group ki’n aprann sa ladans ti’n vin donn en performans?
Msye Patrick Prosper osi ti annan en group zenn ki i ti’n montre zwe lenstriman tradisyonnel ek ladans. Oli zot dan letan festival kot nou pe sipoze promouvwar nou kiltir? Oli sa bann ladans? Dan bann distrik pa i ankor annan dimoun, menm si tre pe, ki kapab organiz sa bann keksoz?
Lo kote labiyman e fason pennyen pa ti ava bon vwar bann dimoun pe danse dan nou bann labiyman parey kazak avek penwanr, rob gode, maksi, tayfiting, rob gonfle, rob friz ek pos plake devan…pour bann fason pennyen tel parey avek kordon latwal, katoupet ek gongon… sa ki kreol e ki bokou pa konnen oubyen zot per pour asosye zot avek me ki pour nou e mon kwar nou devret santi nou fyer. Ki rol distrik in zwe pour mobiliz dimoun dan kominote pour partisip dan en tel gran manifestasyon? Toulezan bann sponsors fidel Festival Kreol i fer zot kontribisyon finansyel. Eski pa ti ava bon ki enpe sa larzan i ganny servi pour peye e siport bann pti antreprener oubyen bann dimoun aze dan distrik pour rod bann zartifay neseser e pey zot deplasman pour vin anvil dan letan festival pour vin vreman montre piblik tou valer ek larises nou kreolite?
Mon felisit Madanm Freminot pour son gran latasman a sa bann valer e koutim ki fer maryaz tradisyonnel vreman tradisyonnel. Felisitasyon Madanm Freminot. Mersi Lenstiti Kreol pour al tir Akt Kolok 2010 lo letazer anba lapousyer. Nou pa kapab toultan zis organiz kolok e pa fer sa ki i rekonmande.
Komite lorganizasyon i annan en lannen pour planifye keksoz ki vo lapenn. Me ki nou vwar ? Menm dimoun, menm kalite ladans lannen ale lannen vini. Si nou pa fer atansyon nou pou en pep ki napa lidantite. In ler pour nou aret zis koze e fer leloz kreol kan an realite en kantite keksoz ki nou ti kapab mobilize pour fer nou pa pe fer.
Bokou nou bann manm lasanble, ladministrater distrik ek lezot dimoun ki voyaze e reprezant nou pei zot konn tre byen ki i tre anbarasan letan zot ganny demande oli zot kostim nasyonal e zot napa enn pour mete ou montre e zot pres pour pa konnen ki fason pour eksplike ki zot ete e kote zot sorti e ki langaz zot koze.
Konsernan Vilaz Kreol, lo progranm byen detaye in mete ki lavant manze kreol ek prodwi artizanal pou anvant toulezour dan vilaz pandan tou dirasyon festival, me oli?
Lendi midi edmi dan Vilaz Kreol ti annan zis ennde landrwa ki ti pe vann manze e ti annan gran laliny e dimoun ti pe konplent ki bann manze pa ti vreman reflekte kreolite e ti tre ser (60 roupi en bwat swadizan plen!)
Oli kari koko pwason sale ek bred pti fey? Oli satini reken, mayok, patat, bannann bwi, penpen ek galet, satini bred, frisiter, mang, papay, eksetera, eksetera…
Oli kapatya, boul, sapo, fler, tant ek lezot lobze fer avek fey, tanmi, zanponn ek kafoul koko?
Kote zot ete? Lekel ki pou fer? Byensir se bann dimoun dan kominote e pour zot vini fodre komite lorganizasyon i rod zot e pey enpe zot fre pour deplase e rod bann zartifay neseser e pour sa fodre komite i travay avek distrik. Nou tou nou konnen lavi i ser Sesel e i tre koute pour fer en deplasman sorti dan bann leo pour vin anvil. Sa bann dimoun i bezwen sipor pour vini.
Lendi ti annan en bato krwazyer dan por e bokou touris ti pe ale vini pandan lazournen e Vilaz Kreol ti mor e ti vid. Apard sa ennde landrwa ki ti pe vann manze e enn ki ti pe vann rafresisman (en limonad 25 roupi!) tou larestan sa bann pti stòl ti vid. Me sa pa en loportinite manke pour fer sa bann touris depanse e kit enpe larzan ki nou vreman bezwen dan nou pei ?
In ler pour bann organizater travay avek distrik pour donn nou en festival ki vreman donn kreol sa respe e sa valer ki i merite dan tou son laspe. Annou get enpe pli profon dan tousala e annou fer en keksoz ki byen e vo lapenn.
Mersi bokou pour lespas.
En Kreol tre konsernen
Not Editer: Bann pwennvi eksprimen dan sa let i pwennvi sa loter e pa nesesermen reflekte pwennvi zournal Seychelles NATION.