Minis pour Lapes ek Lagrikiltir i vizit ennde laferm lo Praslin |08 November 2017

Pandan ki i ti lo Praslin pour en lot langazman Vandredi pase, Minis responsab pour Lapes ek Lagrikiltir Madanm Pamela Charlette ti profite pour vizit ennde laferm e enterakte avek bann fermye ki ti fer sorti plizyer bann konstrent ki zot pe fer fas avek.

Parmi bann dimoun ki ti akonpanny Minis Charlette lo sa vizit ti sekreter prensipal pour lapes Msye Michael Nalletamby e sa ki pour lagrikiltir Msye Antoine Marie Moustache. Ti osi annan plizyer zofisye Lazans Lagrikiltir osi byen ki bann responsab ek reprezantan distrik.

Premye laferm ki Minis Charlette ti vizite ti sa ki pour Msye Pierre Philoe Cap Samy dan distrik Baie Sainte Anne e li i fer elevaz koson.

Apre sa Minis Charlette ti zwenn Msye Jourdan Bonnelame ek son partener dan sa biznes, Msye Ralph Souffe, touzour Baie Sainte Anne. Sa de fermye ki apard plante zot fer elevaz koson e osi bef ki apard pour lavyann zot osi vann vivan.

Parmi bann defi ki sa bann prodikter zannimo ti met alatansyon Minis Charlette i mank marse pour zot bann prodwi.

“Problenm isi Praslin se ki nou napa en labatwar pour touy nou bann zannimo ki fer nou pa kapab vann avek lotel e sa i en difikilte pour nou,” enn parmi zot ti dir Minis Charlette.

Laferm Madanm Veronica Capricieuse, Anse Kerlan, ti dernyen ki Minis Charlette ti vizite. Sa madanm i osi fer elevaz zannimo e i annan en pti labousri.

Parey lezot avan li Madanm Capricieuse ti fer resorti plizyer difikilte ki bann fermye i rankontre toulezour e sa i enkli mank manze ek latizann neseser pour bann zannimo e osi difikilte pour touy bann zannimo akoz napa en bon labatwar Praslin.

“Konsernan labatwar mon’n demann enpe plis klarifikasyon e Minis in donn son parol ki sa pou fer lannen prosenn,” Madanm Capricieuse ti dir.

Lo son kote Minis Charlette in vwar pour limenm sitiasyon sa bann fermye e not zot bann konsern ek difikilte ki zot pe fer fas avek.

Minis ek son delegasyon pandan zot vizit kot serten sa bann laferm lo Praslin