Aksyon kriminel anver touris |13 November 2017

Otelye lo Praslin i met devan zot konsern

Bann otelye ek lezot partner tourizm lo Praslin in kapab diskit avek bann lotorite dan pei lo logmantasyon aktivite kriminel kont bann viziter lo sa zil.

Zot ti zwenn avek Minis pour Tourizm, Laviasyon Sivil, Por ek Marin Maurice Loustau-Lalanne, komisyonner lapolis Kishnan Labonte ek lezot manm zot delegasyon dan en rankont kot lotel Paradise Sun, Vandredi apremidi.

Sa rankont, organize par lasosiasyon tourizm (SHTA) lo sa zil, ti’n ganny planifye boner semenn pase avek bi pour diskit logmantasyon aktivite kriminel kont bann viziter lo sa zil. Sa sitiasyon ki’n aprezan ganny dekri konman en kriz, ti anpire detrwa zour plitar kan en koup Otrisyen ti ankor ganny atake Côte d’Or e sibir serten dimal. Sa ti double lenkyetid lo size sekirite lo Praslin, sirtou pour bann operater sa lendistri. Bokou dimoun ti asiste sa rankont pour aport zot kontribisyon pour ede remedye sa sitiasyon o pli vit posib.

Minis Loustau-Lalanne ti partaz son mekontantman anver sa bann tris aksyon ki i ti dekri konman ‘vid delo bwi lo nou pye diri’. In reasir langazman departman tourizm pour ogmant lakantite lalimyer lo semen, sirtou dan rezyon Côte d’Or ki pli frekante par bann touris. Sa departman pou osi zwenn ek lezot departman konsernen pour netway bann landrwa ou batiman ki a pe ganny servi par bann sispe pour maske.

Minis Loustau-Lalanne in osi fer resorti zot polisi pour bann tel lensidan, ki deza anplas me ki pa pe ganny respekte, posibleman akoz en mank konnesans.

Bann operater tourizm ti eksprim bokou dezapwentman lo lefet ki tro souvan bann lotorite i reaktiv olye reste proaktiv e evit bann tel lensidan. Bokou operater in partaze ki zot souvan anbarase avek reaksyon e mank profesyonalizm departman lapolis kan i annan bann tel lensidan ki zot plito pa raporte.

«Nou envestir bokou dan bann sistenm sekirite kot nou prop letablisman, me sekirite nou kliyan dan semen i reste responsabilite gouvernman e nou santi ki bokou plis i devret ganny fer pour asir sa,» Msye Robert Payet, popriyeter lotel Le Duc de Praslin ti dir.

Bann otelye in osi fer serten sizesyon ki ava ede dan sa lalit pour ogmant sekirite lo Praslin, tel ki lentrodiksyon en brans Lakour Siprenm permanan lo sa zil. Aksyon drastik i devret ganny pran avek bann ki koupab ensi ki bann lezot endividi ki nwir (harass) bann touris pour aste ekskirsyon oubyen fri.

Lo son kote, departman lapolis i anvizaze ogmant patrol lo semen, entrodwir bann konstab spesyal dan bann diferan distrik e re-entrodwir lapolis tourizm.

«Lannen prosenn, nou anvizaze repar stasyon Baie Ste Anne pour fer li vin en stasyon an operasyon konplet olye en reporting station parey i ete konmela. Nou pe osi mazin entrodwir de stasyon mobil ki a kapab stasyonn diferan landrwa lo Praslin,» komisyonner Labonte ti partaze.

Sizesyon ki bann operater i kontribye anver sa de stasyon mobil atraver zot taks CSR pa ti ganny sipor bann operater zot menm ki santi ki zot pe deza fer bokou e ki lotorite konsernen i devret zot osi pran zot responsabilite anver en sitiasyon ki ti’n kapab ganny evite si zot ti’n ganny ekoute depi byen avan e  aksyon ganny pran. Zot ti plito sizer posibilite ki en parti tourism tax i ganny envestir lo Praslin anver bann tel depans.

Lo son kote, Madanm Sybille Cardon, responsable SHTA, in eksprim swe sa lasosiasyon ki aksyon ava ganny pran pour ede aret bann tel aksyon degradan ki pe gat zimaz nou pei.