FPAC pa dakor ki gouvernman i pey travayer Seselwa kot IOT zot trezyenm mwan saler |26 January 2018

Komite pour Finans ek Kont Piblik dan Lasanble Nasyonal (FPAC) in dir ki zot sirprann pour aprann ki gouvernman pe bezwen ankor sa lannen pey trezyenm mwan saler tou bann travayer Seselwa kot lizin ton Indian Ocean Tuna Ltd (IOT).

Tyermenn FPAC, Msye Wavel Ramkalawan, ki osi dirizan lopozisyon dan Lasanble Nasyonal, ti dir ki sa bann travayer, parey tou travayer Seselwa, i bezwen ganny en trezyenm mwan saler me sa ki zot pa dakor avek se ki se gouvernman ki pe bezwen, ankor sa lannen, pey en trezyenm mwan saler sa bann travayer.

FPAC i oule ki IOT i pey son bann travayer limenm.

Sa reaksyon FPAC in vin apre ki gouvernman ti anonse Merkredi ki en sonm 4.3 milyon roupi sorti dan ‘Contingency Fund’ pe ganny servi pour pey sa 474 anplwaye Seselwa kot sa lizin.

Minis pour Finans, Komers ek Planifikasyon Ekonomik, Peter Larose ti dir ki sa peyman, ki Prezidan Danny Faure in aprouve, i en komitman gouvernman pour fer sir ki sa bann travayer i ganny zot trezyenm mwan saler avan le 31 Zanvye.

«I nou responsabilite konman en gouvernman pour onor nou komitman vizavi sa bann travayer e nou oule reasir zot ki tou prosedir neseser pe ganny fer pour fer sir zot resevwar zot saler avan lafen dimwan parey in ganny preskrir anba lalwa,» Minis Larose ti dir.

Msye Ramkalawan i dir ki gouvernman pa’n fer le neseser pour amann lalwa ki gouvern bann biznes ki fonksyonn dan zirisdiksyon Seychelles International Trade Zone (SITZ) e ki gouvernman i bezwen vwar 5.3 milyon roupi pour pey sa bann travayer.

«Nou’n enpe sirprann parski lannen pase letan nou ti pe koz lo trezyenm mwan saler pour IOT nou ti dir avek gouvernman ki IOT limenm li i devret trouv sa 5.3 milyon roupi pour pey sa bann travayer, akoz IOT i en lakonpannyen ki fer en profi 100 milyon roupi par an. Gouvernman ti dir wi i pou fer li. Me nou’n trouve ki pour dir 2017 gouvernman pa’n pas okenn regilasyon. E sa i pa ni en lalwa ki nou pe koz lo la. Nou pe koz lo regilasyon ‘SI’ anba International Trade Zone Act. E anba la i annan bann regilasyon kot lanplwa i konsernen. Ki mannyer pour settle bann problenm lanplwa enkli ki mannyer pour pey konpansasyon,» Msye Ramkalawan ti dir.

I ti azoute ki an Desanm 2017 letan ki FPAC ti vwar ki i annan sa sonm 5.3 milyon roupi, Lasanble Nasyonal in lev sa konman en size e ki lo tou lede kote latab zot ti koup sa 5.3 milyon roupi. I dir ki gouvernman ti dir zot pe vin avek sa regilasyon an Desanm 2017 me ki zot pa’n fer li.

«Si gouvernman ti vin avek sa regilasyon, IOT konman en lakonpannyen ti pou bezwen pey sa trezyenm mwan lapey. Me letan ki gouvernman pa’n fer li e dir nou ki i pe al tir sa 5.3 milyon roupi dan Contingency Fund, sa ankor enn fwa i pa byen. Akoz i pa byen? Letan Lasanble Nasyonal i koupe, li i al tir dan Contingency Fund,» Msye Ramkalawan ti dir.