Lanmor Berard Jeannie zour koudeta le 5 Zen 1977 |03 April 2018

Prezidan Faure i formelman demann pardon lafanmir

Prezidan Danny Faure in formelman demann pardon fanmir Msye Berard Jeannie, en zofisye lapolis ki ti perdi son lavi zour koudeta an 1977. Sa zofisye, ki ti en zabitan Anse Boileau e ti aze 26-an, ti pe travay sa zour kot kordgard Mont Fleuri letan i ti perdi son lavi.

Prezidan Faure ti fer sa demann Zedi pase State House dan prezans kat frer ek de ser defen Msye Jeannie. Bann frer i Rock, Louis, Pierre ek Jean Baptiste e sa de ser ki ti prezan i Maria ek Marthe. Lot ser Marianne ti absan.

Zot ti prezan pour ansanm avek prezidan rann li omaz. Prezidan ti partaz soufrans ki bann manm fanmir in pas ladan pandan sa 41-an.

«Pandan sa dernyen 10 mwan, mon’n annan plizyer diskisyon avek lafanmir Jeannie. Zot ek mwan, nou’n koz lo nesesite pour ferm en paz tre doulere e ouver en nouvo paz ki ava enspir nou zenn zenerasyon ki pe monte. Ozordi, nou pe zwenn formelman State House pour rann omaz en zenn garson ki ti ne le 5 Oktob 1951. Mon pe koz lo defen Berard Jeannie, en polisye, ki a laz 26-an ti perdi son lavi dan liniform, lo duty, dan en fason brital le 5 Zen 1977. Ozordi, mon formelman demann pardon sakenn de zot, frer ek ser defen Berard Jeannie pour la fason ki zot in perdi zot frer,» Prezidan Faure ti fer resorti.

Lo kote lafanmir, Rock ek Maria ti dir ki zot osi zot pardonn sa ki’n komet sa aksyon ensi ki sa ki akonplis la dan e zot ti remersye Prezidan Faure pour annan sa kouraz pour aksepte sa dyalog pour met en lafen avek sa trazedi doulere ki zot in viv avek pandan tou sa letan.

«Se avek limilite ki ou’n abes ou pour aksepte sa gro fardo versman disan nou frer Berard ki ti arive le 5 Zen 1997, probableman ou ti ankor tre zenn, petet 15-an. Nou tre apresye ki ou’n aboli sa selebrasyon 5 Zen menm si i form parti nou listwar, akoz nou lafanmir Jeannie ti vreman soufer an silans kot touletan nou ti pe reviv sa zour doulere», Maria ti dir Prezidan Faure.

«Lo non Louis, Rock, Marianne, Marthe, Pierre, Jean Baptiste e mwan Maria, nou senserman aksepte ou demann pour pardonnen e met en lafen avek sa trazedi lanmor nou frer. Sa ki pou reste dan nou memwar se tou son bann bon souvenir …reprimann nou avek ladouser, sa zonm dous, kalm e vreman pare pour ed lezot,» Maria ti dir.

I ti osi remersye Prezidan Faure pour son gratitid e swete ki Bondye i donn li lasazes pour akonpli bann lezot latas difisil ki in ganny konfye pour ki i a kapab anmenn pei dan lape ek trankilite.

Lo son kote, frer Berard Jeannie, Rock ki ti tre emosyonnel, ti koz lo lavi son frer. I ti dir ki Berard ti ganny enspire pour vin en polisye par zot granmanman apre ki ti antann lo radyo ki bann zenn ti pe ganny rode pour antre dan lafors lapolis.

Rock ti azoute ki son frer ki pa ti ni bwar ni fimen, ti annan respe pour tou son bann siperyer, tou son bann lezot koleg gard ensi ki lezot dimoun. 

I ti dir ki son frer ki ti osi annan nosyon dan aranz radyo ek mont, ti touzour pare pour ranplas bann ki pa kapab vin travay.

Lo lapar lafanmir Jeannie, Rock ti dir ki i napa laenn kont personn e ki i pardonn zot, e i ti remersye Prezidan Faure pour fer sir ki Berard in ganny rekonnet.

Savedir sa sapit lo sa lensidan in fermen.