Valer pour mwan, valer pour nou tou Zenn ek twrazyenm-az i partaz lekperyans |23 June 2018
En group 3enm-az ek en group zenn ti rankontre yer pour partaz zot fason viv ek bann valer ki zot in aprann e ki zot aplike dan zot lavi toulezour.
Sa ti atraver en aktivite organize par Konsey Nasyonal pour Lazenes (SNYC) e ki ti deroul dan sant lazenes Rivière Anglaise.
Madanm Beryl Dodin, direkter servis sipor pour bann zenn, ti dir ki bi par deryer sa aktivite sete pour revwar bann valer ki bann 3enm-az ti aprann dan lepase e ki mannyer bann zenn konmela pe ankadre sa bann valer dan zot lavi toulezour.
Lazournen ti konmans avek en lapriyer par Paster Abel swivi par en zistwar ki ti ganny lir par en zenn garson, Keine Banane.
Pour met bann partisipan dan laganm sa aktivite, en ekstre sanson ‘Les Li’ par Jean Ally ti ganny zwe.
Envite spesyal dan sa aktivite ti Madanm Antoinette Barra ki aze 99-an e li i ti partaz son leksperyans dan son fason viv lontan e mannyer in sanze konmela.
Madanm Barra i eksplike ki lontan zot ti manz bokou friyapen dan diferan form tel ki ladob, griye e osi bwi, e ki kantmenm zot ti mizer, sa pa ti en problenm.
I osi dir ki lavi lontan ti dir me sa pa ti anpes zot viv en bon lavi.
Lo kote valer, Madanm Barra i dir ki ‘bonzour’, ‘mersi’ ek lezot form lapolites ti ganny enkilke dan li e in touzour reste dan li. Son fiy, Gemma, ti osi prezan dan sa aktivite.
Madanm Jeannita Laporte ti osi partaz son parkour. I rakonte ki lontan, letan ou ti al lekol, ou ti ganny korize ouswa bate pour de keksoz : si ou lenz ti andezord ouswa ou ti sal, e si ou kaye pa ti prop.
I osi dir ki bann pli gro manze ki zot ti prefere ti friyapen, kokosyer, satini reken, satini pwason sale, parmi lezot. I osi note ki lavi konmela in sanz bokou parske konmela nou vwar bann zenn pli konsantre ek zot teknolozi e lontan vi ki ti napa tousala, bann zanfan ti plizoumwen zwe deor ek kanmarad.
«Nou pe planifye ankor levennman koumsa akoz bann 3enm-az i en group ki parey sa trezor ki annan tou sa bann valer e alor nou bezwen aprann avek zot. Zot osi zot pe abitye avek sa lemonn konmela,» Madanm Dodin i dir.
Lazournen ti kontinyen avek bann diskisyon an group, poem ek diskisyon an zeneral.