Drayver taksi kot lotel Kempinski i eksprim zot mekontantman |27 August 2018

En group drayver taksi ki ofer servis lotel Kempinski, Baie Lazare ki ti blok le de larantre sa lotel boner Sanmdi bomaten an siny protestasyon, i ekspekte ozordi zwenn avek bann responsab sa lotel osi byen ki bann responsab departman tourizm dan demars pour trouv en solisyon pour zot konsern.

Zot protestasyon i swiv desizyon sa lotel pour limit kantite taksi ki pe ganny otorize pour antre kot sa letablisman alafwa.

Dapre sa bann drayver, ti Zedi semenn pase ki zot ti ganny averti atraver en let ki pa ti’n sinyen ki sa lotel ti pe aprezan otoriz zis trwa taksi anndan lakour lotel alafwa.

Pour laplipar sa bann taksi, en dizenn zot anviron, zot in travay avek sa lotel depi ki i ti ouver an 2012 e toulezour zot in antre kot sa lotel pour esper zot bann kours san okenn problenm ziska Zedi ler zot ti ganny sa let pour enform zot ki zot pou nepli kapab fer sa.

Sa bann drayver ti proteste Sanmdi pour eksprim zot mekontantman vi ki zot dir personn pa’n konsilte zot avan en tel desizyon in ganny pran e menm si in annan zefor pour fer ki responsab sa lotel i siny sa let ki’n ganny sirkile sa in anven.